يا زمان الطائفية
هي بلد ....لا مش بلد ...هي قرطة عالم...مجموعين...مطروحين...مضروبين ...مقسومين
قوم فوت نام ...وصير احلم أنو بلدنا صارت بلد
صدق زياد
اليوم استنتجت أنو الطائفية هي عبارة عن مرض ينتقل بالوراثة الاجبارية....أحيانا بالعدوى...وأحيانا بالدم ...ومن الدم ...وللدم
اللي خلاني اتشجع و اكتب عن الطائفية هو شخص صديق جديد اسمو نوار...عمرو 18 سنة...تناقشت انا و هو بكتير أمور و حسيت أنو مانو رضيان عن حال الطائفية اللي عنا...وحسيت بالأمل من لما حكيت معو...وحسيت أنو لسا في عالم ممكن تغير و تتغير
شو أشكال الطائفية...شو مظاهرها ...كيف منشوفها من بعيد
على مستوى الطفولة ...بيولد الولد و بيشرب مع الحليب و بياكل مع البيض أفكار أنو هو سني أو علوي أو مسيحي...وأنو هو غير الكل...والكل غيرو....وأنو يا عيوني يا بابا هيدون عالم ما كويسين ما كتير تتعاطى معون.....كتير منيح
بيكبر الولد و ما كتير بيعرف كيف يعني ما كويسين ....بس بيعرف أنو ما لازم يسرق ولا لازم يكذب ولا يتعامل مع غير طوايف زيادة عن اللزوم
بالنسبة الي كشخص علوي على الهوية...لا طائفي و أممي في الحياة ....رح اروي شي بيتعلق بطائفتنا و اللي صار من حواليها
العلوي عند المسيحي والسني شخص همجي متخلف عدائي...بالاضافة انو عند المسيحي مغتصب للعذارى المسيحيات ...وعند السني ضال عن طريق الله
فينا نسأل ليش هالنظرة؟؟؟؟وفيني جاوب
العلويون طائفة قبعت لفترة طويلة في الجبال و القرى الساحلية...عاشت حياة صعبة و قاهرة منذ الاحتلال العثماني مرورا بالفرنسي ثم ما بعد الاستقلال...تعرضت هذه الفئة للعزل و الإبعاد المقصود...بقيت في تلك القرى و الجبال مبعدة عن مظاهر الحضارة التي نعم بها غيرهم ممن عاشوا في المدينة...بقيوا بعيدين ليصبحوا في نظر من أبعدهم متخلفين و همج كما هي الصورة
تبلورت هذه الصورة من خلال العلاقة الثلاثية ....إقطاعي-شوباصي-مرابع.........الإقطاعي و هو مالك الأرض....الشوباصي و هو موكل بأعمال الإقطاعي في منطقة معينة من أملاك الإقطاعي الواسعة....وللعلم عدد الاقطاعيين كان لا يتجاوز اصابع اليد....والمرابع وهو الفلاح العامل في تلك الأرض
الاقطاعي و الشوباصي كانا من الفئتين المسيحية و السنية....والمرابع وهو الفلاح العلوي
يحصل الإقطاعي صاحب الأرض و النفوذ على أغلب المحصول...و الشوباصي صاحب الدهاء على قسم وافر...ويبقى للمرابع صاحب الجهد ما يبقيه و عائلته على قيد الحياة
الفقر و الابعاد و الظلم أبعد العلويين عن الحياة المتمدنة و عن العلم و التعلم
ولكن هذا المرابع الذي لطالما قبع في تلك الأرض منشغلا في تأمين حياته مبعدا عن العلم قاوم تلك الظروف...وثار على واقعه...وزحف إلى المدينة ليتحول من المرابع إلى المدرس...والمهندس...والطبيب...والضابط...والشهيد....ورغم كل هذا بقي في بعض العيون متخلفا و يجب عدم الاختلاط به
كيف تحول العلوي في نظر العائلة المسيحية إلى شخص ندل متعطش لانتهاك حرمتهم و اغتصاب بناتهن؟؟؟
فئة من العلوين نالت لأسباب يعرفها الجميع نفوذا واسعا لدرجة خولتهم فعل ما يريدون...هذه الفئة كانت عبارة عن بضعة عائلات ...هذه العائلا أصبحت سببا و مسببا لكل أنواع الفوضى و الخراب....وكل انواع التجارات المحرمة ...ومن ثم تحولوا لبث الرعب في الشارع و إهانة الشعب بكل طوائفه
كان رجالات هذه العائلات من الظلم و النفوذ بان كانوا قادرين على انتقاء أي فتاة يشتهون...يفقدونها أغلى ما تملك و يرمونها بمأساتها لتعاني بصمت و تعاني عائلتها بصمت خوفا و رعبا ....وهذه الفتاة قد تكون مسيحية ...علوية...او حتى سنية
بقيت هذه المأساة في صدور الجميع....ولكن المسيحيين لم يستطيعوا تقويمه و تحديده ...فتحول لكره و حقد لكل الطائفة العلوية و كل العلويين
تجربتي الخاصة مع هالموضوع
عندي نوع من المزيج من الأصدقاء و المعارف من كل الطوائف....البعض تجمعني به علاقة طبيعية و صحية و تصل لدرجة الصداقة....والبعض الاخر فيها شيء من التشوه....الأمر بيزعلني...لأني عشت مواقف كتيرة حسيت فيها بالاهانة
الوقت الوحيد اللي بشعر فيه بالتفاؤل و الأمل هو لما شوف أصدقائي اللاطائفيين اللي حواليي....بتفاءل باليوم و بالمستقبل
تحية لزيد و يزن وبشار....لجورج...لعصام....ولنوار اللي شعل الموضوع
تحيتي لكل من لم يسألني عند اول تعارف عن طائفتي
تحيتي لكل من لم يتهامس مع صديقه او صديقته عن طائفتي
تحيتي لكل من لم يغير تعامله معي بعد أن عرف طائفتي
تحيتي لكل من نسي طائفتي
تحيتي إلى اللاطائفي
posted by Alloush @ 4:34 PM
6 Comments:
يازلمة وطي صوتك، مابتعرف أنو بسورية ما في طائفية، وأنو أنت بهالحديث عم تثير نعرات طائفية. العمى شو بحياتك مو شايف نعامة، أخي تعلّموا من النعامة... والله بتعيش مرتاحة
Dear Sir,
Thank you for admitting that. Now, please go out and speak volume to your people and tell them in a loud voice, stop the discrimination and fear the consequences. They are hurting your sect and bringing disaster to our beloved country. Work with civil societies to expose this ill. Look deeper in the structure of the government and how it function and feel the ordinary people from all sects. Every voice count and take it on you to make a change, one voice could change the direction of the future.
Dear Sir,
Thank you for admitting that. Now, please go out and speak volume to your people and tell them in a loud voice, stop the discrimination and fear the consequences. They are hurting your sect and bringing disaster to our beloved country. Work with civil societies to expose this ill. Look deeper in the structure of the government and how it function and feel the ordinary people from all sects. Every voice count and take it on you to make a change, one voice could change the direction of the future.
يعني عن جد ما بعرف شو بدي قلك ...
يعني بس شوف انو في شباب بفكرو متلي و متلك بنبسط لو كانو قلال ... و بنفس الوقت بزعل أو بتساءل أنو معقول نقدر و لو كنا قلال نخليون هنّة القلال ...
بس شو بدك تعمل مع الشعب العنيد....
بس مع هيك
انت بتعرف انو ما بنعيش لولا فسحة الأمل ......
عم تسأل ليش عم يحجبولك الموقع..أكيد رح يحجبو لأنو برأين هيك موقع
((شي فاشل))...
فقلي
بالنسبة لبرا شو يا زكريا...
على كلن انتبه و خليك عم تحكي ب((هدوء نسبي)) وما كتير تثقل بالحكي....
لأنو متل ما بتعرف ((العقل زينة))...
و بالنهاية بهنيك .... و بقول (((أنا مش كافر...بس اجتمعوا فيي كل الإشيا الكافرين.)))
و شكرا....
بالبرغل في طائفية ... داء العصر الممنوع من العصر والهضم , داء بلاء مستحيل الحل في الوقت الراهن لذلك فضلوا الطريقة المؤقتة النعامية ودحش الراس والاذنين والفم في التراب لحل هذه المشكلة التي ستنفجر يوما ... ورح تفجرنا معاها .... شكرا لهذه الكلمات
U will still make a tear slip away each time u say whats going on inside every one of us/them ....all of us
Post a Comment
<< Home